La gievgia en damaun aveva la Credit Suisse annunzià per l'onn 2015 ina perdita da 2,9 milliardas francs, ed ina reducziun da radund 4'000 plazzas. Per dar damogn a la situaziun ha la Credit Suisse annunzià da dar gas cun las mesiras da spargn. La reducziun da las plazzas duai vegnir realisada pli spert che planisà, uschia ch'i pudess tuttina dar relaschadas. Sco quai che la CS ha communitgà, vegn era spargnà tar las bunificaziuns.
Las raschunas tenor la CS
La raschun principala sajan tranter auter rectificaziuns da la valur en l'investmentbanking - quai che fetschia or 3,8 milliardas francs, communitgescha la banca. L'onn 2000 aveva la Credit Suisse cumprà la banca d'investment americana DLJ. Ina fatschenta che n'ha betg rendì.
Tenor atgnas indicaziuns saja il resultat dentant era vegnì engrevgià cun custs da renovaziun da la banca e cun reservas dad 821 milliuns francs per cas giuridics.
Plinavant ha la CS annunzià da stritgar 4000 plazzas.
Savair cumenzar quasi tar null
Tenor l’expert da finanzas Damian Gliott haja la banca tgunsch vulì scriver giu tut en ina, per pudair far maisa schubra. Uschia ch’ins possia lura ils onns che vegnan puspè nudar megliers resultats.
Per la medema perioda, per l’onn 2015, ha la gronda concurrenta la UBS, pudì nudar in gudogn da 6,2 milliardas francs. Là saja la situaziun tenor Gliott in’autra. La UBS haja già cumenzà a far urden bler pli baud e pli radical che la CS. La UBS haja gia scrit giu fitg bler, perquai vesia uss ora meglier tar lezza.
«Jau persunalmain manegia ch’ils problems da la CS n’èn betg schliads cun questas mesiras.»
Futur da la Credit Suisse duess vesair ora meglier
Per il proxim temp quinta Gliott che la CS possia puspè far in gudogn, cunquai che la banca haja scrit giu tut quai ch’ella haja pudì. L’expert da finanzas manegia dentant, che la Credit Suisse haja anc adina in pau in schuschuri, uschia ch’era il temp futur na vegnia betg simpel per la banca.