Siglir tar il cuntegn
cuntegn

Svizra La tschintgavla Svizra fiss il quart grond chantun

Mintga dieschavla persuna cun pass svizzer viva a l'exteriur. Bun in quart da tut ils Svizzers a l'exteriur vivan en Frantscha.

La tur Eiffel a Paris.
Legenda: Maletg simbolic: Bun in quart da tut ils Svizzers a l'exteriur vivan en Frantscha. Keystone

Prest 752'000 Svizras e Svizzers vivevan la fin da l'onn passà a l'exteriur e
quai derasà sin prest 200 pajais - pincipalmain però en l'Europa. Cun bun in quart da tut las persunas ha la Frantscha la pli gronda communitad svizra . Quai mussan las novas cifras da l'Uffizi federal da statistica. Suenter ils chantuns Turitg, Bern e Vad fiss la tschintgavla Svizra cun passa 750'000 persunas, il quart pli grond chantun da la Svizra.

Tar las destinaziuns preferidas dals Svizzers e las Svizras per emigrar tutgan er la Germania cun 89'000, la USA cun 80'000 e l'Italia cun 50'000 persunas da naziunalitad svizra. Sin ils proxims plazs vegnan il Canada (40'000), la Gronda Britannia (34'000), l'Australia (25'000) e la Spagna (23'000).

Bunamain trais quarts da tut las Svizras e tut ils Svizzers a l'exteriur possedan dasper il pass svizzer ina u pliras ulteriuras naziunalitads.

RR novitads 12:00