Siglir tar il cuntegn

Header

cuntegn

Svizra La «Transjurane» è cumpletta, ed averta

La presidenta da la Confederaziun Doris Leuthard ha avert en il Giura Bernais l'ultim tschancun da l'autostrada A16. Uschia è l'uschènumnada «Transjurane» dad 85 kilometers averta da Bienna fin il cunfin cun la Frantscha a Delle-Boncourt.

Grazia a quest'autostrada sajan ins ussa dal Giura «en in giena» a Bienna ed al Lai da Bienna, ha ditg la presidenta da la Confederaziun, Doris Leuthard, tar l'avertura uffiziala. Da l'autra vart da l'autostrada, a Delle-Boncourt, sajan ins mo anc 15 kilometers davent da la staziun da viafier Belfort-Montbéliard en Frantscha. Da là cursescha il TGV fin a Paris.

Reducir las distanzas e distgargiar dal traffic da transit

L'ultim tschancun da Court (BE) a Loveresse (BE) na portia però betg mo pli datiers Paris ed insumma la Frantscha, mabain distgargia era vitgs e vischnancas da la Vallée de Tavannes dal traffic da transit.

Bun 76 milliuns francs pro kilometer

Quest ultim tschancun da 9,4 kilometers autostrada ha per radund la mesadad da la distanza quatter vials e tschella mesadad ha dus vials. Custà ha questa pera radund 660 milliuns francs. Purtar ils custs portan la Confederaziun (87%) ed il chantun Berna (13%).

L'entira autostrada ha custà radund 6,5 milliardas francs, ed è vegnida bajegiada da l'emprima badigliada a Saint-Ursanne (JU) avant 30 onns fin oz.

carta cun la A16 da Delle-Boncourt fin a Bienna
Legenda: Ils ultims 9,4 kilometers (cotschen) èn averts e cumpletteschan l'A16, l'uschènumnada «Transjurane». SRF

RR novitads 12:00

Artitgels legids il pli savens