Siglir tar il cuntegn

Header

Navigaziun

La Swisscom analisescha da mintga client la vusch per pudair identifitgar el.
Legenda: La Swisscom analisescha la vusch da mintga client per pudair identifitgar el. Keystone
cuntegn

Svizra La Swisscom enconuscha mintga vusch

Dapi l’avust analisescha la Swisscom la vusch da mintga client che telefona a la hotline. Tar il segund telefon sa il sistem lura gia mo cun udir la vusch tgi che telefona. Tge vul quai dir per il client?

Il motiv principal per l’analisa da vusch saja che la Swisscom possia esser uschia pli segira che la persuna vi dal telefon è propi la persuna ch’ella pretenda dad esser. Mintga vusch è numnadamain unica e sa lascha differenziar tras tempo, autezza, accents e sbagls da vusch. Uschè è la vusch ina indicaziun unica sco ch’ins enconuscha quai gia dal l’impronta dal det.

Swisscom dat betg enavant las infurmaziun

La Swisscom empermetta da betg dar enavant las infurmaziuns. Quellas datas vegnian arcunadas sin in server segir en Svizra. Ed a quel haja be la Swisscom access. En pli di la Swisscom, che las infurmaziuns vegnian mo duvradas per la hotline e betg per auters affars interns.

Ins na sto betg laschar analisar

Dapi l’avust vegn mintga client infurmà tar il emprim telefon a la hotline che la Swisscom dovra ussa quest sistem. Tgi che n'è betg perencletg po refusar l’analisa al cumenzament dal discurs u simplamain dar en quella infurmaziun en il center da clients da la Swisscom.

Lura na vegn betg fatga l’analisa ed il client ha da respunder a dumondas da segirtad sco per exempel sia vegliadetgna, ils custs dal davos quint da telefon u il lieu domicil.

Tgi che vul propi far a la segira desista dentant cumplettamain da la hotline e va tar problems en ina da las butias da la firma da telecommunicaziun.