Siglir tar il cuntegn

Svizra La Svizra schela – l'Europa schela cun nus

Ina fradaglia sibirica vegn a sa trair tras la Svizra davent da glindesdi fin mesemna. Ina bischa vegn a procurar che nus resentin la temperatura anc pli fraida.

Planta schelada en.
Legenda: La Svizra sto almain anc schelar fin mesemna. Keystone

Fin mesemna èsi nagut cun giaccas da primavaira: Il termometer vegn a mussar temperaturas sut nulla grads. Giu la Bassa spetgan ins tenor SRF Meteo durant il di -5 grads. Damai ch'ina bisa buffa, vegn la temperatura resentida sco enturn -14 grads, damai prest anc 10 grads pli fraid. E durant la notg sa sbassan las temperaturas lura sin ina temperatura reala da -9 enfin -14 grads.

Sur 2'000 meters ston ins perfin quintar cun temperaturas da pli fraid che -17 grads. En l'Engiadin'Ota ed en il Giura pudessan ils termometers perfin mussar fin -30 grads.

Nagina raritad

La perioda da fradaglia è però nagina raritad: L'enviern 2005 hai dà ina constellaziun sumeglianta. E malgrà ch'ils davos dis da favrer vegnan ad esser murdents èn ins lunsch davent d'in record da fardaglia per l'entir favrer. Il favrer 1956 era la temperatura media il favrer tar -9 grads en la Basilea.

Il mund da temperatura è sutsura

L'organisaziun meteorologica mundiala discurra d'ina situaziun da l'aura «extraordinaria». Entant che grondas parts da l'Europa vegnan a mesirar temperaturas fitg fraidas, vegni en l'Arctica ad esser pli chaus ch'usità. La raschun saja in andetg eveniment da chalira en la stratosfera sur il Nordpol. Uschia na tegnian vents en l'autezza betg pli enavos las massas da vents fraid en l'Arctica.

L'entira Europa è perutgada

Da quai n'è betg mo la Svizra l'ufrenda da las fradaglias, er il rest da l'Europa mesirà temperaturas fraidas:

  • Uschia èsi en Frantscha per exempel uschè fraid sco dapi 13 onns betg pli. En la citad da l'amur spetgan ins il mardi temperaturas fin 10 grads sut nulla.
  • Ed a Roma han ins l'emprima giada dapi sis onns stuì serrar las scolas, perquai che las vias da la chapitala taliana èn cuvertas cun naiv.
  • Il burgamaster da Etterbeck, ina citad en la Belgia, ha ordinà l'arrestaziun administrativa per persunas senza tetg che na vulan betg ir en il alloschament facultativ.
  • Ed ils Austriacs han decidì d'abolir il scumond da sa velar durant ils dis fraids. Dapi l'october 2017 èsi en l'Austria scumandà da velar la part da frunt fin mintun.
  • En la Svezia e la Bulgaria procura il fraid e la naiv per caos da traffic.
  • En la Pologna ha il fraid consequenzas pli gravantas: Dapi il venderdi han las temperaturas fraidas chaschunà la mort d'almain otg persunas.

Or da l'Archiv

RR actualitad 06:00