Siglir tar il cuntegn
Inhalt

Svizra la Svizra returna 321 milliuns dollars a la Nigeria

La Svizra returna ils daners che l'anteriur suveran Sani Abacha aveva acquistà illegalmain da la Nigeria. Ils daners duain vegnir investids en in project che sustegna la segirtad sociala e las gruppas socialas las pli povras.

Deebli Nwiado da Movement for the Survival of the Ogoni People (MOSOP).
Legenda: Deebli Nwiado da Movement for the Survival of the Ogoni People (MOSOP) fa attent sin las circumstanzas en la Nigeria e pretenda en la conferenza dal venderdi che la Svizra returna ina part dals daners illegals a la Nigeria. (maletg dal 2000) Keystone

Il mars 2016 avevan la Svizra e la Nigeria gia suttascrit la decleraziun cun l'intenziun da returnar ils daners da la Nigeria. Ils daners eran vegnids deponids en il Luxemburg. En connex cun ina procedura penala a Genevra eran ils daners il 2014 vegnids bloccads e confiscads per il figl da l'anteriur suveran.

Evitar corrupziun repetida

Ussa han ils pertutgads suttascrit ina cunvegna: Ils daners duain turnar en la Nigeria en furma d'in project. Quel promova la segirtad sociala e sustegna las classas socialas las pli bassas da la populaziun nigeriana. Sustegnì e surveglià vegn il project da la banca mundiala. Per evitar corrupziun repetida vegnan ils daners pajads en purziuns.

Cun la cunvegna vul la Svizra suatar sia strategia da «bloccar», «confiscar» e «returnar valurs da facultad da potentat». En connex cun la decleraziun aveva il minister da l'exteriur Didier Burkhalter segirà:

Il cumbat encunter la corrupziun è ina da las emprimas prioritads da la Svizra.

RR novitads 06:00

In regent corrupt:

Sani Abacha ha regì la Nigeria dal 1993 fin il 1998. Ad el vegn renfatschà d’avair defraudà en tut 2,2 milliardas dollars da la banca centrala nigeriana.