Siglir tar il cuntegn

Header

Navigaziun

Il logo da la SRG SSR.
Legenda: Sper la reducziun da plazzas n'èn er reducziuns dal program betg d'evitar, scriva la SRG SSR. Keystone
cuntegn

Svizra La SRG SSR stritga var 250 plazzas

Pervi da la sentenza dal Tribunal federal davart la taglia sin la plivalur e pervi da la part augmentada da las taxas per emetturs regiunals sto la SSR spargnar 40 milliuns francs l'onn a partir dal 2016. Inevitabel èsi da reducir il program e var 250 plazzas.

Las mesiras da spargn pertutgan cunzunt l’administraziun, l’informatica e la producziun. Reducziuns da program e plazzas n'èn betg d'evitar.

Salvar tantas plazzas sco pussaivel

Desditgas vul la SRG SSR evitar tant sco pussaivel cun pensiunaments anticipads e cun betg occupar plazzas avertas. Ensemen cun ils sindicats veglian ins elavurar in fair plan social. Il sindicat SSM è però schoccà da la decisiun e vul examinar pussaivladads per salvar tantas plazzas sco pussaivel.

Era RTR è pertutgada cun reducziun da program

RTR vegn ad avair en ils proxims onns radund 600'000 francs pli pauc a disposiziun. Spargnà vegn tar las investiziuns tecnicas, tar projects gronds e tar il program.

  • il gieu auditiv quotidian «Vita capita» vegn abolì la stad 2016
  • l'emissiun trilingua davart il maraton da skis engiadinais vegn realisada il 2016 per l'ultima giada
  • la purschida online per uffants «simsalabim» vegn abolida, respectivamain integrada parzialmain en la purschida online dal «Minisguard»
  • la retscha da concerts «Chant au tour» na vegn betg continuada

Reducir 1,3 plazzas senza relaschadas

Relaschadas n'èn betg prevesidas. Dentant reducescha era RTR ses volumen da persunal per 1,3 plazzas (tar in total da radund 130 plazzas cumplainas). La reducziun duai vegnir realisada cun optimar ils process ed en il rom da la fluctuaziun

RR novitads 11:00