Siglir tar il cuntegn
Inhalt

Svizra La sessiun da stad – ina survista

Tradiziunalmain è la sessiun da stad plitost ina sessiun pli quieta. Ina sessiun, nua ch'i na vegnan betg tractads ils temas pesants. Però per questa sessiun datti tuttina in ni l’auter tema che ha paisa. Per il Grischun èn ils emprims dus dis fitg interessants: I va per las ovras idraulicas.

Las rentas supplementaras èn tema en il cussegl dals chantuns, ch'ins vesa sin la fotografia.
Legenda: Las rentas supplementaras èn tema en il cussegl dals chantuns. Keystone

Il cussegl naziunal discuta davart l’energia da damaun. I duai dar novas structuras e reglas per il martgà d’energia. Per exempel duai vegnir obligatoric da cumprar forza electrica regenerabla. Vul dir, ch’ins na pudess betg pli cumprar la pli bunmartgada forza, mabain la forza fatga or da sulegl, vent ni aua. E sche ovras idraulicas pudessan uschia vender dapli energia, pudess il squitsch sin ils fits d’aua vegnir pli pitschen.

In auter tema ch'interessa il Grischun è la posta. I vegnan discutads divers puncts en connex cun la posta. Per exempel vul ina moziun, ch'il postin riva regularmain era en regiuns periferas ch`èn abitadas tut onn. Era las purschidas da las filialas da posta vegnan discutadas, surtut sch'i sa tracta dad in service da posta che vegn per exempel realisà dad in’autra butia. Per regla duess ina posta esser cuntanschibla in maximal 20 minutas a pè ni cun il traffic public.

Las rentas supplementaras èn tema en il cussegl dals chantuns, ch'ins vesa sin la fotografia.
Legenda: Las rentas supplementaras èn tema en il cussegl dals chantuns. Keystone

In dals temas ils pli relevants che vegn tractà en il cussegl dals chantuns è la segunda pitga. Ozendi s'ha la pussaivladad da laschar pajar ora en in sfratg tut ils raps da la segunda pitga, da laschar pajar mintga mais ina renta u la terza pussaivladad, da far in mix da quellas duas variantas.

Discutà vegn ussa sch'i duai en l'avegnir mo pli dar la varianta da laschar pajar ora mintga mais ina renta. L’idea fiss ch’ins vess uschia entradas regularas e na stuess betg pli retrair ina renta supplementara.

RR actualitad 11:00