Siglir tar il cuntegn
cuntegn

Svizra La SBB na vul betg dar ord maun ses monopol

Las Viafiers federalas svizras SBB vulan per tut pretsch salvar lur monopol per il traffic internaziunal e betg ceder ina part a la Bern-Lötschberg-Simplon-Bahn BLS. Perquai han las duas interpresas inoltrà il venderdi lur dumondas da concessiun. Quai han comunitgà tant SBB sco er BLS.

Els dus tegnan ina broschura cun si in tren.
Legenda: SBB na vul betg ceder – Jeannine Pilloud, manadra dal traffic da persunas, ed Andreas Meyer, CEO, tar la conferenza da medias. Keystone

La SBB vul vinavant avair enta maun il traffic svizzer sur distanzas lungas. Quel è la basa per colliar il traffic da trens svizzer cun l'internaziunal.

La devisa da la SBB: «Betg concurrenza, ma cooperaziun»

Perquai na vul la SSB betg ceder ses monopol a favur da la Bern-Lötschberg-Simplon-Bahn BLS. Quella aveva fatg valair l'avrigl, ch’ella veglia er sa participar cun ses trens al traffic svizzer sur distanzas lungas.

Sinaquai haja la SBB fatg in’offerta da cooperaziun a la BLS che quella n’haja dentant betg acceptà, scriva la SBB. La SBB percunter veglia cooperar vinavant cun la Südostbahn SOB co quai ch’i vegnia gia fatg actualmain.

SBB: Midar sistem custass milliuns e milliuns

Sche la concessiun vegnia repartida uschia sco quai che la BLS veglia, dettia be dapli custs, ma nagin niz, scriva la SBB vinavant. La SBB stima ch’in midament dal sistem custass per cumenzar radund 20 enfin 40 milliuns e suenter radund 15 enfin 20 milliuns mintg'onn.

BLS na ceda betg a la SBB e vul vinavant ina part da la turta

Suenter ch'ins n'è betg sa cunvegnì cun la SBB fa la BLS uss la dumonda per la concessiun da pliras lingias da traffic internaziunalas: Ella veglia gestiunar duas lingias d'Intercity sco er duas lingias regiunalas. Quai ha ella fatg a savair en ina infurmaziun a las medias.

Cun intervegnir en il monopol da la SBB vesa l'interpresa che la concurrenza vegniss activada. Quai dettia novs impuls e vegnia la finala da bun als passagiers.

Ussa sto la Confederaziun decider davart la surdada da la concessiun.

RR novitads 11:00+