La situaziun sin il martgà da la lavur en Svizra n'è strusch sa midada l'avust.
La quota da dischoccupaziun è restada tar 2,4%. Quai communitgescha il secretariat statal per economia SECO. Questa quota era gia vegnida cuntanschida il matg, cura ch'ella era crudada sin il pli bass nivel dapi 10 onns.
La fin d'avust eran uschia tut en tut radund 108'000 persunas en Svizra senza lavur. cumpareglià cun l'avust dal 2017 munta quai ina reducziun da la dischoccupaziun per 27'685 persunas u 22,7%.
Er en Grischun quota constanta
En Grischun hai dà l'avust 928 persunas dischoccupadas. Quai è mo ina persuna pli pauc ch'il mais avant. Ultra da quai èn vegnidas registradas 974 persunas che tschertgan ina plazza, che na vegnan però betg dumbradas sco dischoccupadas. Tar quellas tutgan persunas che participeschan a curs da perfecziunament u a programs d'occupaziun ubain persunas che han in gudogn intermediar. En tut resultan pia 1902 persunas ch'èn en tschertga da lavur en Grischun.
Obligaziun d'annunziar plazzas mussa effect
Dapi il fanadur da quest onn ston plazzas libras en secturs cun pli che 8% dischoccupads vegnir annunziadas. Il dumber da plazzas annunziadas al RAV è l'avust s'augmentà en l'entira Svizra per 6'406 plazzas sin total 36'410 plazzas. 21'503 da questas plazzas eran suttamessas a l'obligatori d'annunziar.
Actualmain vala per 19 sorts da professiun l'obligaziun d'annunziar plazzas, tranter auter gidanters per l'agricultura, persunal da service ed acturs. Cun 17% è la dischoccupaziun tar ils constructurs da betun spezialmain auta.
RR novitads 08:00