Siglir tar il cuntegn
cuntegn

Svizra La PS lantscha in'iniziativa da premias

Las expensas per las cassas da malsauns na duajan betg importar dapli che 10% da las entradas d'ina chasada. Questa finamira vul la Partida socialdemocratica cuntanscher cun ina iniziativa dal pievel.

Ils mauns d'ina prsuna ch'etichetescha medicaments.
Legenda: Ils custs da premias creschan, ils chantuns spargnan però cun subvenziunar quels individualmain. Keystone

Cun in’iniziativa dal pievel vul la Partida socialdemocratica distgargiar persunas cun entradas bassas tar las premias da cassas da malsauns. Quai rapporta la «NZZ am Sonntag».

Ils delegads da la PS duajan uffizialmain approvar l’uschenumnada «Iniziativa da premias» il zercladur. La finamira saja da limitar ils custs per las premias a maximalmain 10% da las entradas d’ina chasada. Las premias da cassas da malsauns sajan s’augmentadas a tala moda ils davos onns, che famiglias stoppian per part impunder fin 20% da lur entradas – argumentescha la partida.

Cuosts da premias creschan dapli che las subvenziuns chantunalas

Finamira da l’iniziativa n’è betg en emprima lingia da reducir ils custs da las premias en general, mabain d’augmentar las subvenziuns individualas per uschia reducir ils custs d’ina chasada en relaziun tar las entradas. Dapi 2011 na suondia il budget per reducziuns da premias dals chantuns betg pli il svilup da las premias. Vul dir, ils custs per las premias èn creschids pli ferm che las expensas dals chantuns per subvenziunar las premias individualmain. Uschia argumenteschan ils iniziants.

RR novitads 09:00