Siglir tar il cuntegn
Inhalt

Svizra La Posta survegn chasti da 22,6 milliuns francs

La cumissiun da concurrenza Weko ha chastià la Posta cun 22,6 milliuns francs. La Posta haja malduvrà ses monopol tar la spediziun da brevs en massa da clients da fatschenta, uschia la Weko. La Posta dementescha d'avair fatg sbagls. Ella vul trair vinavant il cas a la Dretgira administrativa.

La Posta ha malduvrà ses monopol.
Legenda: La Posta ha malduvrà ses monopol da spediziun da brevs. Keystone

La Posta ha tenor la Weko impedì il concurrent Quickmail e discriminà tscherts clients. Concret ha la Weko constatà che la Posta n'ha betg duvrà a moda unifitgada ses agen sistem da pretschs.

Per exempel dat la Posta cundiziuns spezialas per clients da fatschenta cun in volum da 100’000 francs. Clients sumegliants survegnivan dentant per part rabats pli bass ch’en il sistem dals pretschs.

Sistem intransparent

La Posta ha introducì in nov sistem da pretschs. L’idea era da remunerar clients che sa tegnian vid las finamiras mensilas fatgas cun l’interpresa. Da l’autra vart stuevan ellas quintar cun consequenzas negativas sch’ellas na cuntanschevan betg las finamiras.

La Posta dementescha

La Posta Svizra vul trair vinavant il cas a la Dretgira administrativa. Las sancziuns na sajan betg giustifitgadas. Els sajan sa cumportads adina correct cun tut ils clients, ha ella communitgà. La concurrenza na saja mai stada restrenschida e nagins clients sajan vegnids a la curta, scriva la posta.

RR novitads 08:00