Siglir tar il cuntegn

Svizra La pli lunga colonna da Tschuncaisma dapi il 1999

Damai ch'il traffic vegn svià sur il pass dal San Bernardino - untgeschan blers automobilists al Gottard. Perquai hai dà colonnas da fin a 25 km avant il portal dal nord. Entant sa normalisescha la situaziun cuntinuadamain.

colonna avant il portal nord dal tunnel dal Gottard, ils 19 da matg 2018
Legenda: Igl è ina da las pli lungas colonnas dals ultims onns, ils 19 da matg 2018 avant il portal nord dal tunnel dal Gottard. Keystone

Perquai ch'il tunnel dal San Bernardino è serrà, vegn il traffic sin quest traject svià sur il Pass dal San Bernardino. Camiuns ed er auto-rulottas na dastgan però betg viagiar sur il pass (vehichels sur 3,5 tonnas).

Tuttina ha er il traffic vers il Pass dal San Bernardino stagnà: Uschia è il traffic la A13 tranter Cuira e Realta stada surchargiada. L'access a la A13 sin l'autezza da La Punt/Rehanau è stà serrà la gronda part dal di. Tranter Spleia e Valragn ha il TCS annunzià ina colonna da 12 km. Plinavant è er la via principala tranter Nufenen e Valragn e tranter Sufers e Spleia stada serrada serrada perquai ch'il traffic era surchargià. Er vers il Lucmagn è il traffic stà surchargià fin il suentermezdi, uschia ha quel stagnà tranter Glion e Trun.

Lungas colonnas sin il traject dal Gottard

Perquai ch'il tunnel dal San Bernardino è serrà, sa concentrescha il traffic da Tschuncaisma da quest onn vers il sid anc pli ferm sin il traject tras il tunnel dal Gottard. La pli lugnga colonna è vegnida annunziada cun 25 km avant il portal nord dal tunnel. Il temp da spetga ha muntà fina 4 uras. Sin il traject vers il tunnel dal Gottard hai ultra da quai er anc dà ina colonna da fin a 6 km avant il tunnel dal Seelisberg. Pervi d'in auto cun ina panna è il tunnel dal Gottard schizunt stà serrà per in curt mument.

Colonna da record

Personen-Box aufklappenPersonen-Box zuklappen

Avant il tunnel dal Seelisberg – nua ch'il traffic dal nord en il sid vegn reglà – hai er dà ina colonna da 6 km. Sch'ins quinta quests 6 km tar ils 22 km ch'i ha dà il medem mument avant il portal nord dal tunnel dal Gottard, lura munta la stagnaziun dal traffic da Tschuncaisma a 28 km.

Tenor viasuisse hai dà l'ultima giada ina colonna da 28 km la Tschuncaisma dal 1999. Era quella giada era il tunnel dal San Bernardino serrà – pervi d'auazun.

Er avant il portal dal sid è sa furmada ina colonna da bun 4 km tranter Quinto ed Airolo. Il temp da spetga ha muntà là a var 50 minutas. Entant sa normalisescha la situaziun cuntinuadamain.

San Bernardino serrà fin ad in'emna

Fin ad in'emna resta il tunnel dal San Bernardino serrà suenter ch'in autobus ha brischà. Quai ha ditg in expert da l'Uffizi federal da vias Astra. Il venderdi suentermezdi ha in autobus tudestg che charrava en direcziun nord cumenzà a brischar curt avant ch'el è stà or dal tunnel. Las 22 persunas a bord han pudì bandunar l'autobus ed il tunnel. Duas persunas han gì ina tissientada da fim.

RR novitads 06:00++