Sch'ins prenda per exempel mo la staziun da mesiraziun Arosa, lura mussan las datas che l'enviern ha cumenzà ils davos 10 onns tranter ils 3 da november (2013) ed ils 16 da december (2006). Quai di Joel Rominger da SRF Meteo.
Guardà uschia è la situaziun actuala nagut extraordinari. Quest onn ha Arosa survegnì ils 21 da november naiv e sche questa na lieua betg, lura taxescha Joel Rominger quai sco l'entschatta da l'enviern ad Arosa.
Situaziun fitg differenta
La situaziun en il Grischun saja actualmain fitg differenta ed er las temperaturas sajan memia autas. Gia il november è stà in dals pli chauds dals ultims onns. Ma er quai na saja nagut extraordinari. Joel Rominger ha guardà en la statistica las temperaturas da Nadal ad Arosa. E là na datti negina tendenza generala.
2 trends differents
Il 2001 ha il termometer mussà ad Arosa -6 grads, il 2012 +12 grads. L'onn 1970 èsi stà -13 grads ed il 1977 +7 grads. Igl è pia dad onn tar onn fitg different.
Igl ha adina dà envierns cun blera naiv ed envierns cun pauca naiv; e la naiv è arrivada magari pli baud e magari pli tard.
Mussà si tenor la statistica è dentant insatge auter, numnadamain che destinaziuns u lieus sut 1'300 meters han adina pli pauca naiv.
RR actualitad la saira 17:00