La Guardia svizra papala duai vegnir engrondida. Da 110 sin 135 persunas. Il cumandant da la guardia Christoph Graf argumentescha l'engrondiment cun il basegn da dapli servetschs e cun l'augment da las mesiras da segirezza. D'occupar las plazzas supplementaras vegnia dentant a durar anc in temp.
Quai haja Graf annunzià a chaschun da la conferenza da pressa tar la saramentaziun dals novs gardists, scriva Kathpress. Questa dumengia vegnan 32 novs gardists far lur engirament festiv. La Guardia svizra papala datti dapi l'onn 1506. Ella fa servetschs da guardia e d'onur ed è responsabla per la protecziun persunala dal papa.
Novas chapellinas ord il stampader 3D
Plinavant ha Graf annunzià che las chapellinas dals gardists vegnian construidas en futur cun in stampader 3D. Cun il stampader po il temp da construcziun vegnir reducì da 100 sin 14 uras. Producidas vegnan ellas d'ina firma svizra da Stans. Ils custs per ina da quellas chapellinas muntan tranter 800 e 900 euros. Per cumparegliaziun: Ina chapellina da gala – che vegn er en futur fatga a maun – custa radund 5'000 francs.
RR novitads 20:00