La gronda part da las persunas cun dretg da votar va er a votar

En Svizra van 9 da 10 persunas cun dretg da vuschar almain mintgatant a l'urna. Quai resulta dad in studi da l'universitad da Genevra.

Ina urna da votaziuns.

Legenda da maletgs: Regularmain van dentant sulet paucas persunas a dar giu lur vusch. Keystone

Il maletg da la Svizra sco pajais cun ina mediocra participaziun a votaziuns ed elecziun stoppia perquai per part vegnì revedì scrivan ils auturs dal studi da l’universitad da Genevra. Sch'ins resguardia numnadamain 20 votaziuns sa participeschian passa 90% dals burgais almain ina giada ad ina tala votaziun. Ma il studi constatescha er che mo paucs burgaisas Svizras e Svizzers van regularmain a votar.

Bleras persunas han interess vida la politica

L'impressiun che varga la mesadad da la glieud n’haja nagin interess per la politica, gie saja frustrà e trumpà da lezza e vegli perquai d’avair da far nagut cun votaziuns, quell'impressiun constettia betg propi, ha ditg Simon Lanz, in dils auturs da quest studi.

Mintga 5 onns ina giada a l’urna

Propi bler n’è quai betg. Quai conceda era Simon Lanz. Il resultat dal studi mussia dentant ch'i dettia sper quels che giajan mai e quels che giajan adina a votar anc ina fitg gronda gruppa da persunas che decidian da cas a cas sch'els giajan a l'urna u betg.

Ch'i dat en Svizra relativ paucas persunas che s'interesseschan insumma betg per temas politics e ch'i dat da l'autra vart era mo paucs democrats exemplarics, quella conclusiun da lur studi na saja betg exnum ina nauscha nova, ha ditg Lanz. «Persunas che van mo sporadicamain a l’urna èn persunas che vegnan influenzadas fitg da campagnas. Sch’ina campagna vegn manada cun auta intensitad e sch’ils temas èn fitg simpels, per exempel la politica d’asil, alura vegnan quellas persunas mobilisadas fitg e van surproporziunalmain a l’urna.»

Ils process politics ston vegnir pli chapibels

Promover l'interess ed augmentar la chapientscha per ils process politics sappian ins per exempel gia en scola. Tenor Simon Lanz mussia lur analisa che talas mesiras possian augmentar la participaziun a las votaziuns.

Il potenzial da motivar la glieud dad ir a votar è pia avant maun. La fin finala schai vid las partidas, las gruppas d'interess e lur projects sch'i vegnan da carmalar il futur dapli votantas e votants a l’urna.

RR novitads 11:00