Siglir tar il cuntegn

Header

Navigaziun

cuntegn

Svizra La dretga vegn pli ferma

La dretga vegn pli ferma en il Cussegl naziunal. La PPS gudogna en tut 11 sezs e tegna ussa 65 mandats en il Cussegl naziunal, tants sco anc mai.

Sch'ins quinta vitiers ils Liberals e las partidas pitschnas cun Lega e Mouvement Citoyen Genevois, lura tegna la dretga uss ina maioritad absoluta en il Cussegl naziunal cun total 101 sezs.

Quellas partidas che han gudagnà avant 4 onns, tutgan ussa tar ils perdiders: ils Verd-liberals, ils Burgaisdemocrats ed ils Verds.

25 cussegliers naziunals han pers lur mandat

Tranter quels che n'èn betg vegnids reelegids hai nums prominents sco Christoph Mörgeli e Hans Fehr da la PPS Turitg, il schef da fracziun da la PS Andy Tschümperlin da Sviz u la verda Aline Trede da Berna.

Persuenter prendan plirs prominents plaz en il Cussegl naziunal, per exempel il schef-redactur da la Weltwoche Roger Köppel da la PPS Turitg u l'anteriur diplomat Tim Guldiman da la PS Turitg.

Gronda participaziun a las elecziuns

La participaziun a las elecziuns per il parlament federal è stada tar 48,4 %. Quai è sco la media dals ultims onns. En cifras absolutas n’han dentant anc mai votà tantas persunas, sco dumengia passada. Sur 2,56 milliuns èn ids a vuschar. En il chantun Grischun è la participaziun stada tar 46 %.

Cumissiun da l'UE vul relaziun nizzaivla per omaduas varts

Suenter la ruschnada a dretga tar las elecziuns federalas en Svizra na vul a cumissiun da l'Uniun europeica betg specular davart consequenzas pussaivlas per las relaziuns bilateralas.

L'UE prendia enconuschientscha dal resultat, uschia in pledader a Brüssel. Ins veglia lavurar vinavant cun la regenza svizra vid ina relaziun che saja nizzaivla per omaduas varts.

Il mument vegnia preparà in ulteriur inscunter tranter il schef da la cumissiun da l'UE, Jean-Claude Juncker, e la president da la Confederaziun, Simonetta Sommaruga.

RR novitads 16:00