Siglir tar il cuntegn
Inhalt

Svizra La cursa per ils dus sezs dal Cussegl federal ha cumenzà

Ch'era Johann Schneider-Ammann ha annunzià sia demissiun pudess levgiar ils cristiandemocrats. Els vulan dentant tegnair ferm vi d'ina successura feminina.

Sutgas.
Legenda: Dus sezs – blers candidats. Keystone
  • Grazia a la demissiun dubla e la responsabladad da procurar per ina successura feminina cunzunt er tar la PLD.
  • La PCD vul tuttina metter a disposiziun in duet feminin.

Dus sezs en il Cussegl federal vegnan libers: Suenter Doris Leuthard ha uss er Johann Schneider-Ammann annunzià sia demissiun. Quai pudess levgiar ils cristiandemocrats. Cun la demissiun da la segunda dunna en il Cussegl federal era la pressiun numnadamain gronda, da chattar ina successura feminina per Leuthard. Uschiglio avessi mo pli ina dunna en il Cussegl federal: Simonetta Sommaruga.

Grazia a la demissiun dubla èn ils cristiandemocrats betg pli sulets cun il squitsch da remplazzar ils sezs cun ina buna repartiziun dals geners. Pertge cunquai ch'ils liberaldemocrats han dus sezs en la regenza, ed in è gia occupa d'in um, è l'obligaziun da purtar ina dunna en il Cussegl federal primarmain tar la PLD. Plinavant san ils cristiandemocrats argumentar, che lur sez saja uss ditg stà en mauns d'ina dunna. La PCD vul dentant tiers la demissiun dubla empruvar cun in duet feminin.

Nus vulain duas candidatas ed ina cussegliera federala.
Autur: PCD

Amherd e Pfister

Ils nums che crodan savens èn cussegliera naziunala dal chantun Vallais Viola Amherd, ch'ha experientscha en l'executiva sco presidenta da la citad da Brig e cussegliera naziunala da la Basilea Elisabeth Schneider-Schneiter. Da las tschintg cusseglieras guvernativas da la PCD èn Heidi Z'graggen da l'Uri e Carmen Haag da la Turgovia vegnidas en il gieu.

PLD vinavant in num da famiglia dubel?

Sco successura favorita da Johann Schneider-Ammann vala Karin Keller-Suter, ch'aveva gia candidà cura che Schneider-Ammann era vegnì elegì.

En dumonda vegniss er la cussegliera naziunala dal chantun Sviz e presidenta da partida Petra Gössi.

Dunnas ed il Cussegl federal

Enfin uss han set dunnas surpiglià il pensum da cussegliera federala. Durant ina curta perioda eran las dunnas perfin en la maioritad. Quai suenter il cumenzament da Simonetta Sommaruga il november 2010 e la demissiun da Micheline Calmy-Rey la fin 2011.

RR novitads 12:00