Siglir tar il cuntegn
Inhalt

Svizra La CS stritga 5'500 plazzas

Tenor l’agentura da novitads svizra sda duajan las 5‘500 plazzas vegnir stritgadas tar tut las unitads d’interpresa da la CS. En Svizra resta tenor il schef da la CS, Tidjane Thiam, tar la reducziun gia annunziada: Enfin l'onn 2018 stritga la CS 1'600 da sias 17'000 plazzas.

Purtret d'ina entrada cun si il logo da la Credit Suisse.
Legenda: Il trend da las cifras cotschnas cuntinuescha tar la CS. Keystone

L'onn passà aveva la Credit Suisse stritgà 7'250 plazzas cumplainas.Quai èn 1'250 dapli che annunzià. Quest onn duajan suandar ulteriuras 5'500 plazzas.Tenor l’agentura da novitads svizra sda duajan quellas plazzas vegnir stritgadas tar tut las unitads d’interpresa da la CS. L’october dal 2015 aveva la CS annunzià da vulair stritgar fin il 2018 1'600 da las 17'000 plazzas en Svizra. Tar quai restia, ha ditg il schef da la CS, Tidjane Thiam, a la conferenza da medias.

La CS ha la finamira da spargnar il 2016 1,4 milliardas ed enfin l'onn 2018 dapli che 4,2 milliardas, per gulivar il nausch resultat da l'onn 2015. Per l'onn 2016 haja la banca reussì la finamira. Ella ha spargnà passa 1,9 milliardas ed ha uschia schon bunamain cuntanschì la mesadad da la finamira enfin l'onn 2018.

Il trend da las cifras cotschnas cuntinuescha

Per l'onn 2016 scriva la Credit Suisse ina sperdita da 2,44 milliardas francs. Il chasti da milliardas pervi da la dispita d'ipotecas cun ils Stadis Unids numna la banca gronda sco motiv principal. La restructuraziun da la banca haja producì custs en l'autezza da radund 540 milliuns francs. Ma er las fatschentas da la banca n'èn betg idas bain, scriva la CS.

L'onn 2015 ha la banca gì anc ina pli gronda sperdita da 2,94 milliardas francs. Là ha sur tut la rectificaziun da la valur procurà per la sperdita. Quai che pertutga las fatschentas è la banca dentant stada meglier vidlonder l'onn 2015.

La banca ha gì l'onn 2015 in gudogn avant taglias da 4,2 milliardas. Per l'onn 2016 datti là be 615 milliuns ed è uschia bler pli bass. Sur tut vegnì mender è la banca d'investiziuns e las fatschentas cun l'administraziun da la facultad en la regiun da l'Asia e Pazifik. Sa megliurada è la situaziun da las fatschentas en Svizra ed en l'administraziun da la facultad internaziunala.

RR novitads 08:00++