L'investment banking saja ina sparta fitg chara, surtut pervia da las autas pajas dals collavuraturs, declara l'expert da finanzas Damian Gliott. Sche l'investement banking rendia, saja pussaivel da far gronds gudogns - il mument na saja quai dentant betg il cas.
Per puspè far gudogns sto la Credit Suisse tegnair bass ils custs.
Perquai giavischass Damian Gliott insatgi a la testa che ristgass da pigliar decisiuns - forsa era decisiuns malempernaivlas sco per exempel da reducir persunal. Mo era sche las sutgas dal schef Tidjam Thiam e dal president dal cussegl d'administraziun Urs Rohner baluccan actualmain, na saja betg da quintar cun ina midada a la testa il proxim temp.
Cumprar la CS per 30 fin 40 milliardas
In'aczia da la banca vala il mument a la bursa be pli enturn 10 francs. Dapi in onn ha il curs da l'aczia da la Credit Suisse pers circa 60% da sia valita. Quai pudess esser lucrativ per in concurrent da surpigliar la Credit Suisse, di Damian Gliott. El quinta cun in pretsch da 30 enfin 40 milliardas francs.
