Uschia duai la Confederaziun spargnar en vista al program da stabilisaziun ils onns 2018 e 2019 radund 100 milliuns francs dapli tar il persunal che quai ch’il Cussegl federal aveva proponì. Il Cussegl naziunal suonda uschia a las propostas da la cumissiun da finanzas ed ha votà cun 106 cunter 81 vusch per la proposta da la cumissiun.
Posts da duana na duajan betg vegnir serrads, ha ditg il pledader da la cumissiun. Il parsura dal Departament federal da finanzas Ueli Maurer ha appellà da era spargnar tar ils posts da duana.
Birocrazia memia gronda
Ils aderents da las mesiras da spargn argumenteschan che la birocrazia creschia senza mesira ed uschia era ils custs da persunal. Quai stettia betg sulet en connex cun il dumber da persunal ma era cun las pajas che saja creschidas dapli che la chareschia, ha ditg Thomas Aeschi (PPS/ZG).
Reducziun da prestaziuns
Ils adversaris da las mesiras da spargn pli autas tar il persunal da la Confederaziun han argumentà senza success che tar il persunal federala saja vegnì spargnà gia ils onns passads. Da surproporziunalas expensas da persunal na possia betg vegnir discurrì. Da reducir a tala moda il persunal portia era ina reducziun da prestaziuns, ha ditg Barbara Gysi (PS/SG).
RR novitads 11:00