La Banca naziunala svizra ha agì gist

Tenor la retschertga da gfs.bern per la SSR attestescha ina gronda maioritad in agir gist a la Banca naziunala svizra cun schliar la garanzia per il curs da l'euro da CHF 1.20.

Grafica da petta che mussa 56% gist, 17% fauss, 27% indecis

Legenda da maletgs: Barometer d'elecziuns da la SSR/gfs.bern 2015, ils 11.03 - 19.03.2015, (n=2'17) RTR

Passa la mesadad dals dumandads sustegnan la politica da la Banca naziunala svizra. Quai cun schliar il curs minimal per l'euro da CHF 1.20. Stgars in 5avel taxescha la pratica sco faussa. Radund in terz n'han nagina opiniun en quel tema.

En egl dat tenor la retschertga che l'opiniun gronda e positiva vegn per la gronda part da la Svizra tudestga. Tant en la Svizra franzosa sco era en la Svizra taliana n'è l'acclamaziun betg uschì clera.

Concret èsi 60% dals dumandads da la Svizra tudestga ch'èn persvas da la acziun da la Banca naziunala svizra. En la Svizra taliana èsi 47% ed en la Svizra franzosa anc 46% ch'èn persvas dal plan. La cumpart dals adversaris da la mesira è tar radund 17% en tut las regiuns linguisticas.

RR novitads 17:00

La retschertga

Per il barometer d'elecziuns da la SRG SSR ha l'institut gfs.bern interrogà 2'017 persunas cun dretg da votar en Svizra. Quai tranter ils 11 ed ils 19 da mars 2015. Il sbagl da prova è tar +/- 2,2%.