Siglir tar il cuntegn
cuntegn

Svizra L'urs è turnà

Ils 26 da matg è in urs vegnì observà e fotografà en la vischnanca Eriz datiers da Thun. I vegn supponì in animal masculin giuven. Quai communitgescha la direcziun d'economia dal chantun Berna.

L'urs da bell'aura a spass en la cuntrada bernesa.
Legenda: L'urs è vegnì obervà e fotografà ils 26 da matg en il Eriz. Keystone

Igl è l'emprim urs selvadi dapi 190 onns en il chantun che porta er in urs en sia vopna. Quai saja in mument istoric, vegn Niklaus Blatter, l'inspectur da chatscha da Berna, cità en la communicaziun dal departament. L’ultim urs en libertad era vegnì observà l’onn 1823 en il Saanenland en vischinanza da Gstaad.

L’animal da vopna è turnà en il chantun Berna.
Autur: Niklaus Blatterl'inspectur da chatscha da Berna

Tenor las autoritads sa tractia tar l’animal probablamain dad in giuven mastgel ch’è stà enfin uss extremamain discret e fitg timid. Uss èn ils organs da surveglianza da chatscha vi da sclerir l’identitad da l’urs.

Ils Bernais duajan annunziar sch'els vesan l'urs

Las autoritads han dumandà a la populaziun, cunzunt a quella en la regiun Eriz, dad annunziar observaziuns da l’urs e da far attenziun. L’urs è in animal stgarpant. Dentant pensia el, uschia Niklaus Blatter en in intervista cun radio SRF, che quest urs vegnia immediatamain a sa retrair tar in inscunter cun umans.

Ils urs fan entaifer curt temp lungas distanzas ed en il chantun Berna na san ins betg, sche l’urs è anc en la regiun. Tenor la communicaziun da Berna sa pudessi tractar tar il animal da quel ch’era vegnì vesì differentas giadas en il chantun Uri.

RR novitads 12:00