Siglir tar il cuntegn

Header

cuntegn

Svizra L'inquisiziun penala cunter Jürg Jegge vegn probablamain sistida

La procura publica dal chantun Turitg ha investigà pervi d'abus sexual d'uffants cunter Jürg Jegge. Damai ch'ils cas examinads èn surannads vegn l'inquisiziun probablamain sistida.

En ses cudesch «Jürg Jegges dunkle Seite» ha Markus Zangger fatg public l'avrigl 2017 ils abus sexuals d'uffants dal pedagog renumà, Jürg Jegge. Sco l'emissiun da SRF «DOK» ha retschertgà, ha la polizia entant interrogà pli ch'ina dunsaina anteriurs emprendists da la fundaziun «Märtplatz». Jürg Jegge ha fundà l'institut da scolaziun protegì ed era manà quel davent dal 1985 fin il 2011.

Sco victimas hajan sulettamain Markus Zangger, ses frar Daniel Zangger ed Andreas Guggenberger dà perditga cunter Jürg Jegge. Els trais èn era s'exprimids en la publicitad. Sco las retschertgas da «DOK» mussan, sajan quels trais cas però surannads. «DOK» sa, ch'i dat almain duas victimas ch'han refusà da dar perditga a la polizia. Els hajan gia patì avunda sut il cas d'abus e na veglian betg anc ina giada discurrer da quai ch'è succedì. Sch'i na dat naginas novas cumprovas cunter Jegge u nagin recurs cunter la disposiziun da sistida, lura sisteschia la procura publica l'inquisiziun aifer las proximas emnas.

L'emissiun «DOK» cun il titel «Das System Jegge – Missbrauch im Schatten der Reformpädagogik» vegn emessa questa saira a las 20.05 sin SRF 1.

RR novitads 10:00

Artitgels legids il pli savens