Siglir tar il cuntegn

Header

Purtret d'ina ovra nucleara.
Legenda: L'iniziativa per sortir da l'energia nucleara na para betg da chattar blers simpatisants. Keystone
cuntegn

Svizra L'iniziativa per sortir da l'energia nucleara vegn refusada

Er il Cussegl federal refusa l'iniziativa. Ella chaschunass gronds problems. La Svizra na pudess betg procurar pli per avunda energia per garantir la prestaziun momentana.

L’iniziativa chaschunass gronds problems, ha ditg la cussegliera federala Doris Leuthard. Da sortir da l’energia nucleara saja bun, ma l’iniziativa prevesa memia pauc temp da far quest pass. I saja impurtant da far quai a moda e maniera ponderada e coordinada.

La part d'electricitad che mancass da las ovras atomaras na possian betg vegnir remplazzadas svelt avunda, di Leuthard. Tar dapli imports avess la Svizra in problem cun l'infrastructura. La renovaziun da questa saja bain planisada, dovria dentant onns per finir.

Sche l’iniziativa vegniss approvada ils 17 da november alura stuessan trais da 5 ovras atomaras serrar il 2017. Quai fissan Beznau I e II e Mühleberg. Gösgen stuess vegnir tschentà giu il 2024 e Leibstadt 2029.

La regenza dal chantun Turitg è cunter l’iniziativa per sortir da l’energia nucleara. Al chantun Turitg appartegnan direct u indirect radund in terz da l’interpresa Axpo che posseda la gronda part da las ovras atomaras en Svizra.

RR actualitad 17:00