Chaschuna ina zona da pressiun bassa vairamain migrena, asma, trombosas, problems cun il cor e depressiuns? Christoph Siegrist da SRF Meteo è sceptic. Cumprovar in effect da l'aura sin ils carstgauns na saja strusch pussaivel. E l'aura possia esser in factur per mals, dentant in factur da blers.
Ina chaussa cumplexa
Il problem cardinal da l'aura biologica è, che l'aura è cumplexa. Ina maschaida da suffel, umiditad, temperatura, pressiun, chemia da l'aria e radis. Ed ils umans èn era cumplexs, mintgin reagescha auter sin in factur.
Sentir l'aura
In'excepziun da l'aura biologica è la previsiun dals pollens. Quai possian ins mesirar bain, ed il sgol dals pollens saja era dependents da l'aura, di Christoph Siegrist.
Che persunas che dian ch'ellas sentian l'aura hajan era mal, na snega nagin. Ch'ils mals derivian dentant mo da l'aura, lez na possian ins betg cumprovar.