Bruno Ganz ha giugà en diversas inscenaziuns da teater e films, sco per exempel «Heidi», «Vitus», «Der Erfinder», « La Provinciale» e «Dans la ville blanche». Anc l'onn passà ha el giugà en il film da Lars von Trier «The House That Jack Built».
El ha er survegnì numerus premis e distincziuns: L'onn 1973 era Ganz «actur da l'onn» ed il 1991 ha el survegnì il premi Hans-Reinhart-Ring da la societad svizra per cultura da teater. 1996 ha el survegnì da Josef Meinrad il Iffland-Ring. Plinavant è el vegnì undrà gist trais giadas cun il premi dal film europeic.
Rolla enconuschenta era «Adolf Hitler»
Renumnà en l'intschess tudestg è el vegnì cun sia rolla sco Adolf Hilter en il film «Der Untergang». Il 2004 ha el giugà la rolla principala sco dictatur – in film ch'è schizunt stà nominà per l'Oscar sco meglier film da l'exteriur. Bruno Ganz ha survegnì il premi da film da la Bavaria sco meglier actuar.
50 onns sin tribuna
Naschì è Bruno Ganz l'onn 1941 a Turitg. Studegià ha el a la scola auta d'art a Turitg. Durant bunamain 50 onns era el sin tribuna e ha lavurà ensemen cun reschissurs sco Peter Zadeck, Peter Stein, Claus Peymann u Luc Bondy. Engaschaments ha el gì a Brema, en il teater a Turitg, Vienna ed a Berlin. Sia davosa rolla sin tribuna ha Ganz giugà il 2012.
Reacziuns sin la mort da Ganz
Il president da la Confederaziun Alain Berset ha declerà, che cun Ganz perdia la tribuna ed il film in dals fitg gronds acturs da la Svizra. El ha menziunà ch'era en las pli nauschas rollas haja ins sentì sia charitad.
El na giugava betg la rolla, el viveva ella.
Tar ses inscunter haja el emprendì d'enconuscher ina famusa persuna che haja vivì ina vita intensiva cun tut sias schanzas e ses ristgs.
RR novitads 14:00
