Siglir tar il cuntegn

Header

cuntegn

Svizra KEYSTONE-SDA: Impressum tema per qualitad schurnalistica

Ina relaziun stretga han ils dus gigants sin il martgà da medias svizzer adina gì. Or da questa relaziun duai uss dar ina lètg. L'agentura da novitads svizra SDA e l'agentura da fotografias e video Keystone vulan fusiunar. Impressum tema dentant per la qualitad schurnalistica.

Da fusiunar l'agentura da fotografias Keystone e l'agentura da novitads SDA saja in grond ed impurtant pass, haja num davart da la nova interpresa KEYSTONE-SDA. Texts, fotografias e videos duessan vegnir en l'avegnir ord ina chasa.

In pass chapibel haja num er da la vart dad Impressum, l’associaziun da schurnalists svizzers. Dentant insumma betg chapibel saja per els, che nagina schurnalista ni schurnalist n'haja in plaz en la direcziun. Urs Thalmann, il gestiunari dad impressum, tema perquai ch'il schurnalissem sco tal pudess perder qualitad ed impurtanza en la nova firma.

audio
Bunura: SDA-KEYSTONE – critica vers la nova interpresa
ord Actualitad dals 01.11.2017.
laschar ir. Durada: 2 minutas 21 Secundas.
La direcziun duai vegnir cumplettada cun schurnalistas u schurnalists!
Autur: Urs Thalmann Impressum

Quai dementescha Jann Jenatsch che fa part da la direcziun. La qualitad schurnalistica, quella duai vegnir mantegnida. Ed era sche nagin da la direcziun na saja schurnalist, possian ins quintar cun in team cun blera experientscha che sustegna la direcziun.

Nus pudain quintar cun in team cun blera experientscha schurnalistica che sustegna la direcziun.
Autur: Jann Jenatsch COO KEYSTONE-SDA

Però quai na basta ad Impressum. L'associaziun pretenda che la direcziun vegnia cumplettada cun schurnalistas u schurnalists.

Tenor Impressum pudess anc in auter aspect influenzar il schurnalissem: I saja il privel, che la vart schurnalistica vegnia maschadada pli ferm cun la vart commerziala. La Keystone haja per exempel gia mess a disposiziun fotografias per il diever schurnalistic ch'eran oriundamain vegnidas fatgas per reclama.

Era questa renfatscha dementescha Jann Jenatsch. La fusiun n'ha betg l'intenziun da reducir la part schurnalistica. I pudess dentant esser, che sch’ins fa ina fotografia dad in sportist per il club, ch’ins metta quella fotografia era a disposiziun per artitgels schurnalistics. Dentant na duai quai betg esser il cas tar temas cun in'autra relevanza schurnalistica.

Reducziun da plazzas

Cun ina fusiun saja la probabilitad auta che plazzas vegnian reducidas, di impressum. La KEYSTONE-SDA conferma, che administraziun vegnia duvrà en la nova interpresa mo ina e betg pli duas. En quest sectur stoppian uschia vegnir stritgadas plazzas. Ulteriuras reducziuns da plazzas na sajan dentant betg previsas per il mument.

La fusiun è planisada per il 1. da schaner.

RR actualitad 07:00

Artitgels legids il pli savens