Ils acziunaris da l'agentura da novitads svizra SDA e da Keystone han approvà la fusiun da las duas societads. La fusiun va cun quai en vigur retroactiv sin il prim da schaner da quest onn.
Avant la fusiun aveva la SDA repartì radund 12 milliuns als acziunaris. Ina proposta dals sindicats d'impunder la mesadad da quels per in plan social da la SDA han ils acziunaris refusà. Ils sindicats dals collavuraturs da la SDA crititgeschan quai.
La primavaira era vegnì enconuschent che la fusiun ha per consequenza che 36 da las 150 plazzas da la redacziun vegnian stritgadas.
