Johann Schneider-Ammann vul restar cusseglier federal

Johann Schneider-Ammann vul restar cusseglier federal almain fin la fin da la legislatura actuala l'onn 2019. Quai ha el ditg davant las medias a Berna, paucs dis avant che ses onn d'uffizi sco president da la Confederaziun va a fin.

Cusseglier federal Johann Schneider-Ammann

Legenda da maletgs: Il president da la Confederaziun Johann Schneider-Ammann fa ina bilantscha positiva. Keystone

El saja stà bler sin viadi ed haja uschia rimnà jetlag, ha Johann Schneider-Ammann ditg en vista a l'onn intensiv sco president da la Confederaziun. Savens pareva el stanchel, e perfin exaust. Plinavant haja ina costa rutta al mudergià. Però uss sa sentia el puspè bain, el saja saun e salv.

Cuntent cun ses onn da presidi

Davart ses onn sco president da la Confederaziun tira Johann Schneider-Ammann ina bilantscha positiva. Tenor el saja quai stà in onn da success. Il Cussegl federal haja lavurà bain sco equipa e tschertgà ensemen soluziuns. El saja motivà da lavurar vinavant era suenter l’onn da presidi.

Puspè access a daners da l'UE

Sco success da quest onn vesa il president da la Confederaziun era il fatg ch’il parlament ha approvà la realisaziun da l’iniziativa da massa. Quai lubeschia a la Svizra da puspè esser commember cumplain dal program da perscrutaziun da l’UE Horizon 2020.

RR novitads 12:00