Avant la radunanza plenara al WEF a Tavau è il president da la Germania Gauck s'exprimì per dapli chapientscha per ils pensiers da la populaziun. E per dapli chapientscha per la politica da fugitivs da la Germania e da l’UE da pudair controllar la immigraziun en l’Europa. Er ha Gauck mussà l’emprim ina tscherta chapientscha per ils stadis en l’ost da l’Europa che temia da perder l’identitad naziunala. Ma i saja grev da chapir che gist ils stadis nua che la populaziun vegniva persequitada avant paucs onns na possian betg mussar dapli solidaritad envers ils fugitivs, ha ditg Gauck. Che quests pajais giajan uss atgnas vias sajan in privel per il patratg europeic che haja purtà pasch e bainstar en l’Europa e nagin possia esser interessà da destruir questa ovra.
Da recepir fugitivs na saja betg mo ina obligaziun morala
La recepziun da fugitivs en l’Europa na saja betg mo ina obligaziun morala ma er ina responsabladad umanitara, ha ditg Gauck. La politica sto dentant colliar l’interess dals burgais vid in stadi che funcziunescha cun in l’idea umanitara da sa gidar cun persunas che basegnan tal agid. Strategias da limitar l’immigraziun na sajan betg sulet nun eticas, per part pussibilitescha la limitaziun dapli acceptanza.
L’Austria ha annunzià da limitar il dumber da fugitivs
L'Austria vul limitar quest onn il dumber da fugitivs. La coaliziun da regenza a Vienna è sa cunvegnida sin in dumber maximal da 37'500 fugitivs per l’onn 2016. L'onn passà aveva l'Austria anc recepì 90’000 fugitivs. Ils proxims 3 onns vul l'Austria recepir maximal 127'500 fugitivs, quai è vegnì communitgà a Vienna. Anc betg enconuschent è, sch'il dumber da fugitivs vegn a surmuntar la limita maximala.
RR novitads 14:00