Il 2007 elegia il parlament a Berna la Grischuna Eveline Widmer Schlumpf en il Cussegl federal. Sia elecziun è il punct culminant da tensiuns ch'i dat gia dapi in temp en la Partida populara svizra. Cun acceptar l'elecziun vala Widmer Schlumpf sco traditura per baininqual en la PPS. I dat ina separaziun en la partida. En il Grischun sco er en auters chantuns vegnan fundadas partidas chantunalas burgais-democraticas.
Schlumpf, Janom Steiner e Hassler
En il Grischun èn sper la nov elegida cussegliera federala Widmer Schlumpf er Barbara Janom Steiner e Hansjörg Hassler players impurtants per la naschientscha da la PBD grischuna. Els èn d'auters avis che la partida mamma, la PPS e fundeschan la partida chantunala. Il november 2008 datti lura la PBD Svizra. Enfin il 2013 vai ensi cun la partida giuvna. Ella gudogna en tut 88 mandats sin nivel chantunal.
Spirala negativa
Suenter suonda dentant il trend negativ. Cun la demissiun d'Eveline Widmer Schlumpf vai en tschella direcziun. La partida perda ses chau ed er bain inqual mandat, en il Grischun dentant er en auters chantuns e sin nivel naziunal. Vitiers vegn che la PBD grischuna vegn il 2018 avant las elecziuns da regenza en ina schletta glisch. Quai en connex cun il cartel da construcziun en Engiadina Bassa. A lur dus candidats Jon Domenic Parolini ed Andreas Felix vegn renfatschà d'avair savì dapli da las cunvegnas da pretsch. L'entira istorgia munta donn d'image per la partida. Ultra da quai sto Andreas Felix retrair sia candidatura durant il cumbat electoral.
Er sin nivel naziunal na vai betg bler meglier. Il sulet cusseglier naziunal da la PBD, Duri Campell na dumogna betg la reelecziun a Berna. Er en auters chantuns perdan ils burgais democrats mandats, e cunquai la finala er la grondezza da fracziun en il parlament.
Or da l'archiv
Il 2010 han ils Cuntrasts rapportà da l'istorgia da la PBD grischuna.
