Siglir tar il cuntegn

Svizra Ir cun auto cun 17 – bainbaud realitad?

En l'avegnir duain giuvenils gia cun 17 onns pudair emprender d'ir cun auto. L'Uffizi federal da vias ha tramess en consultaziun ina tala proposta. Il medem mument duai la scolaziun da charrar vegnir meglra e pli bunmartgada.

Purtret d'in scolast d'ir cun auto ed ina scolara.
Legenda: Bainbaud duai gia esser pussaivel cun 17 onns d'emprender d'ir cun auto. Keystone

La scolaziun duai vegnir meglra ma il medem mument duai l'administraziun daventar pli simpla ed era pli favuraivla per automobilistas ed automobilists. Qua ils puncts impurtants ch'il cussegl federal propona:

  • Tgi ch'è sut 25 onns po mo far l'examen sch'el ha gì durant in onn il permiss d'emprender d'ir cun auto ed ha er pudì rimnar experientscha durant quest temp. Per ch’el sappia tuttina far igl examen gia cun 18 onns sa el far la teoria e survegn il permiss d’emprender gia cun 17 onns.
  • Da nov duain duas lecziuns da scolaziun en ina scola professiunala dad ir cun auto vegnir integradas. Durant quellas duain ils automobilists emprender da far fermadas totalas e co reagir en cas ch’ins sto franar andetgamain.
  • Il permiss d'ir cun auto sin emprova per trais onns duai vinavant dar, dentant ston ins far be pli in curs da scolaziun, oz èn quai dus. Quest curs da scolaziun sto vegnir fatg durant ils emprims sis mais ch'ins ha il permiss d'ir cun auto.
  • Tgi che absolva igl examen cun in automat duai el futur era savair charrar cun in auto cun girs a maun. Enfin uss n'era quai betg pussibel.
  • Il proceder da s’annunziar, pajar ed auters pass administrativs duain vegnir simplifitgads. La finamira è da savair reglar dapli sin via electronica.

Permiss gia cun 17 onns

L'emprova da far il permiss d'ir cun auto pli baud che cun 18 hai adina puspè dà. La Confederaziun è adina stada averta per la proposta. Uschia hajan novs manischunz dapli temp per pudair rimnar experientscha avant che survegnir il permiss sin emprova.

RR novitads 10:00