Siglir tar il cuntegn
cuntegn

Svizra Interpresas tessinaisas pajan lur quints il pli tard

Interpresas dal Tessin e da la Svizra franzosa spetgan en Svizra il pli ditg da pajar lur quints - entant che quellas or dal chantun Uri èn las pli spertas. Quai tenor in studi dal servetsch d'infurmaziun d'economia Bisnode.

Maisa cun calculatur da tastga e quints.
Legenda: In studi dal servetsch d’infurmaziun d’economia Bisnode mussa cura che las interpresas svizras pajan lur quints. Keystone

In studi dal servetsch d’infurmaziun d’economia Bisnode, il link avra en ina nova fanestra mussa ch'interpresas dal Tessin e da parts da la Svizra franzosa spetgan pli ditg da pajar lur quints, che las bleras interpresas da la Svizra tudestga. Uschia han interpresas tessinaisas pajà ils quints en 61,5% dals cas cun in retard da 15,7 dis, quai tenor cifras da l'emprim mez onn dal 2016. En la Svizra romanda, cun ils chantuns Vad, Genevra, Giura e Neuchâtel, munta la cumpart dals quints pajads memia tard tranter 47,6% e 55,6%.

Interpresas grischunas datiers da la media

Interpresas grischunas na pajan lur quints betg bler pli spert, ed er betg bler pli tard che las autras. Cun 38,4% dals quints che vegnan pajads memia tard ed in retard da 10,5 dis, è la quota dal Grischun in pau meglra che la quota da l'entira Svizra.

La grond'excepziun: Sviz

A la testa da la glista dals 'paja-tards' èn surtut interpresas ord la Svizra taliana e franzosa. I dat dentant ina grond'excepziun en la Svizra tudestga: il chantun Sviz. Las interpresas da Sviz èn suenter il Tessin quellas che pajan lur quints il pli savens cun retard, e quai cun 10,7 dis.

Las interpresas dal Uri èn las pli responsablas

Il chantun cun las pli bleras interpresas responsablas è l'Uri. Mo 18,7% dals quints pajan interpresas dal Uri memia tard – e quai cun in retard da be 7 dis.

RR novitads 11:00