Svizra - Interpresas cun aut potenzial d’expansiun
La Svizra dumbrava il 2014 en tut 4594 interpresas cun in aut potenzial d’expansiun. Tar questas interpresas dumbran tut las interpresas che han nudà ils ultims trais onns in augment d’occupaziun da passa 10%. Talas interpresas han stgaffì tranter il 2011 ed il 2014 en tut 88’245 plazzas novas.
Sco l’Uffizi federal da statistica scriva dumbran uschia 7,7% da las interpresas cun almain 10 emploiads tar las uschenumnadas interpresas da «High-Grow-Enterprises». Bun duas terzas da questas interpresas fan part da la branscha da servetsch, in quart da la branscha d’industria.
La pli gronda expansiun nodan interpresas en las branschas da construcziun, industria, energia ed dals servetschs tecnics e scientifics, scriva l’Uffizi federal da statistica.
