Intensivar la collavuraziun cun la Tunesia

La Svizra haja accumpagnà il process da la democratisaziun da la Tunesia dapi la revoluziun avant 5 onns.

Il president da la Tunesia, Beji Caïd Essebsi durant l'inscunter cun il president da la Confederaziun Johann Schneider-Ammann

Legenda da maletgs: Il president da la Tunesia, Beji Caïd Essebsi è s'inscuntrà cun il president da la Confederaziun Johann Schneider-Amm... Keystone

A Berna ha cumenzà la visita uffiziala dal president da la Tunesia, Beji Caïd Essebsi. Il Cussegl federal ha beneventà en corpore la delegaziun en Chasa federala. Là ha il president da la Confederaziun, Johann Schneider - Ammann, tegni in pled da bainvegni en il qual el ha fatg endament la buna relaziun dals dus pajais.

Accumpagnà il process

La Svizra haja accumpagnà il process da la democratisaziun da la Tunesia dapi la revoluziun avant 5 onns. E quest process vegnia a cuntinuar empermetta Johann Schneider-Ammann en ses pled da bainvegni.

Democrazia, quai na saja betg insatge che saja simplamain dà, fa Schneider-Ammann endament. Mintga generaziun stoppia perquai puspè scuvrir, rinforzar ed approfundar ils principis che furmian la basa da la democrazia.

Mo el saja persvas ch'i na dettia nagina libertad ni democrazia senza in fundament economic solid. E quella stoppia porscher a la giuventetgna ina furmaziun ed ina plazza da lavur, pia ina perspectiva.

Gronds problems en la Tunesia

Schneider - Ammann è conscient che la Tunesia saja confruntada cun gronds problems, per exempel en il sectur da la segirezza, tar il svilup economic ni tar il cumbat cunter la dischoccupaziun da la giuventetgna. Per surmuntar quests problems possia la populaziun tunesiana quintar cun la Svizra, ha Schneider-Ammann empermess.

Svizra - in bun exempel

En sia resposta ha il president da la Tunesia, Beji Caïd Essebsi engrazià a la Svizra per la lunga amicizia tranter las duas naziuns. La Svizra saja in exempel per la Tunesia.
Dapi la revoluziun e la fugia da l’anteriur president Ben Ali haja ses pajais fatg in grond progress. Era en il sectur da las instituziuns democraticas. Dentant la democrazia saja insatge che stoppia vegnir viviì e betg decretà da surengiu.

Essebsi ha engrazià a la Confederaziun per ses sustegn sin la via da la dictatura a la democrazia. En spezial ha el menziunà la collavuraziun tar l'elavuraziun da la constituziun nova da la Tunesia. Mo quai ch'els hajan cuntanschi saja en privel pervi dal terrorissem.

Tunesia vul er esser exempel

Essebsi spera che la Tunesia daventia in di in model per ils auters pajais arabs. In exempel co in stadi civil democratic possia nascher ord las ruinas da la guerra e dictatura.

Per che la Tunesia possia cuntinuar sin sia via saja dentant er impurtant che l'economia fetschia progress e che la populaziun haja ina perspectiva. Essebsi beneventa perquai las stentas ed il sustegn da la Svizra ed el spera che la visita rinforza quella collavuraziun fritgaivla. Ina collavuraziun che duaja far progress - pass per pass.