Siglir tar il cuntegn

Svizra Iniziativa «Vatgas cun corna» vegn avant il pievel

L'iniziativa da pievel «Per las vatgas cun corna» è reussida. Sco quai che la chanzlia federala communitgescha sajan vegnidas inoltradas passa 119'000 suttascripziuns valaivlas. L'iniziativa pretenda tranter auter dapli subvenziuns per purs che na fatg betg giu la corna a lur vatgas u chauras.

ina vatga cun corna
Legenda: Ils 23 da mars 2016 è l'iniziativa vegnida surdada a la chanzlia federala. Keystone

En Svizra n'han entant bun trais quarts da tut las vatgas da latg nagina corna. Quella vegn d'ina vart fatga giu per sminuir il privel da blessuras da l'autra vart per raschuns economicas. Vatgas cun corna dovran dapli plaz en stalla.

L'iniziativa pretenda che la Confederaziun promova cun «stimuls economics» las furmas da producziun favuraivlas als animals. En spezial duain ils possessurs d'animals cun corns survegnir sustegn finanzial. Davos l'iniziativa stat la cuminanza d'interess vatga cun corna ch'è vegnida fundada il 2012 dal pur da muntogna Armin Capaul.

RR novitads 16:00