I para da daventar in cumbat da David cunter Goliat. Ma che vul l'iniziativa davart il servetsch public insumma? E tgenins èn ils cunterarguments?
Service empè da profit - quai è la devisa dals iniziants da l'iniziativa «Pro Service public». Davos l'iniziativa cun il titel lusingiant stattan schurnalists e schurnalistas da magazins da consuments sco il K-Tipp e Saldo.
Ina survista dal project da votaziun
La finamira «Service empè da profit» è formulada cun las trais pretaisas suandantas:
- La posta, la SBB e la Swisscom na duain betg aspirar in gudogn.
- Renditas duain vegnir reinvestidas en las gestiuns sezzas e betg fluir en la cassa da la Confederaziun.
- Ils schefs e las scheffas da questas gestiuns liadas al stadi na duain betg survegnir ina paja pli auta che quella d'in commember dal Cussegl federal.
«Pro Servic public è contra service public»
Quest recept na persvada betg Kurt Fluri dal PLD - e cun el insumma nagin dal parlament. L'iniziativa è vegnida refusada tant dal Cussegl naziunal sco dal Cussegl dals chantuns senza cuntravuschs. Fluri declera pertge:
Senza gudogn, nagins raps per investiziuns ed innovaziuns. E senza subvenziuns cruschadas stuessan vegnir serradas per exempel filialas da la posta en la periferia che na rendan betg u las lingias da tren che na rendan betg en regiuns ruralas vegnissan abolidas. Il facit da Fluri è perquai era cler: «Pro Service public è contra Service Public.»
Betg «aspirar» da far gudogn
Peter Salvisberg da l'iniziativa Pro Service public bitta sia fatscha en ils mauns sch'el auda quest'argumentaziun.
«Subvenziuns cruschadas èn absolutamain giavischadas. Era en l’avegnir duai vegnir subvenziunada la lingia da tren en la periferia che na renda betg cun raps da la lingia da tren citadina che renda. Quai è il cor dal service public.» El veglia ch'ils raps da la Swisscom restan tar la Swisscom, quels da la Posta tar la Posta.
Ed er l'externaziun dals contrahents da l'iniziativa che l'iniziativa veglia introducir in scumond da far in gudogn per las gestiuns liadas al stadi saja simplamain faussa, di Salvisberg. En il text da l'iniziativa stettia nair sin alv ch’in gudogn na duai betg vegnir aspirà - tut tenor il model da la Migros u dal Coop. E cun quest model saja quai pussibel dad er vinavant far investiziuns, di Salvisberg.
Dependa la paja dal servetsch u viceversa?
E lura datti anc la terza dumonda: Dastgan schefs e scheffas da gestiuns liadas al stadi gudagnar dapli ch’in cusseglier federal? Gea, chatta Kurt Fluri dal PLD. Ils 1,3 milliuns francs paja dal schef da la Swisscom per exempel correspundia al martgà da pajas en Svizra. En cumparegliaziun: Ina cussegliera federala gudogna radund 450'000 francs per onn.
Per Peter Salvisberg percunter mussa la paja d’in schef bler davart la cultura d’ina gestiun: «Sch’in schef curra be suenter a ses bonus n’è la prioritad betg tar in bun service public.»
Gist quest argument para da svegliar bleras simpatias en la populaziun per l'iniziativa «Pro Service public». Tenor la retschertga da trend da l'SRG la pli actuala schessan 46% dals interrogads e da las interrogadas gea a l'iniziativa.
RR actualitad 17:00