Siglir tar il cuntegn
cuntegn

Svizra Iniziativa per scumandar la burca è inoltrada

Il suveran svizzer po fitg probabel votar davart in scumond da la burca. Il comité d'Egerkingen ha inoltrà a Berna si'iniziativa per in scumond da cuvrir la fatscha.

Ina dunna araba che ha cuvrì sia fatscha
Legenda: Ina turista da l’Arabia Saudita che ha cuvrì sia fatscha sesa en in’ustaria ad Interlaken. Keystone

En tut han 106'600 persunas suttascrit l'iniziativa «Gea al scumond da cuvrir la fatscha». La Svizra saja obligada a la libertad, ha communitgà il comité ch'aveva gia lantschà l'iniziativa d'anti-minarets. Tar la libertad tutgia ch'ins guardia in a l'auter en la fatscha.

Comité sa referescha a Tribunal europeic

Schizunt il Tribunal europeic vesi la cuvrida da fatscha religiusa en il spazi public sco cuntradicziun a la convivenza en ina societad libra, uschia scriva il comité. Il scumond pretendì saja perquai giustifitgà, na discrimineschia nagin e violeschia ni la libertad da cretta ni la libertad d’opiniun.

Pliras raschuns per in scumond

L'iniziativa «Gea al scumond da cuvrir la fatscha» na sa drizzia betg mo envers il cuvrir la fatscha ord motivs religius, mabain era cunter il zuppentar la fatscha ord motivs criminals u tar cas da vandalissem, ha aschuntà il comité d’Egerkingen. Fin uss enconuscha mo il chantun Tessin in scumond da cuvrir la fatscha.

RR novitads 16:00