Il secret da bancas en Svizra resta, uschia communitgescha il comité che ha dà enconuschent sia decisiun. Sco ils iniziants scrivan en ina communicaziun, vulevan els integrar il secret en la constituziun e cun quai mantegnair la relaziun da confidenza tranter ils burgais ed il stadi. Els na vulevan nagin barat d’infurmaziuns automatic en Svizra.
L'iniziativa è vegnida lantschada il 2013 dal cusseglier naziunal Thomas Matter da la PPS da Turitg. Las duas chombras parlamentaras han gì reacziuns differentas: il Cussegl naziunal ha sustegnì l'iniziativa ed ina cuntraproposta ed il Cussegl dals chantuns ha refusà omadus. Il Cussegl federal da sia vart era era cunter l'iniziativa.
Protecziun davart fraudaders da taglia
L’iniziativa era vegnida inoltrada sco reacziun sin la revisiun dal dretg penal da taglia ch’il Cussegl federal aveva proponì. La revisiun vuleva evitar che fraudaders da taglia possian sa zuppar vinavant davos il secret da bancas. Las autoritads da taglia avessan gì la pussaivladad da consultar documents da banca, e quai betg be en cas da suspect sin fraud fiscal ma era en cas da suspect sin omissiun fiscala. Oz pon las autoritads da taglia s’infurmar tar terzs, per exempel tar il patrun da lavur, sch’ina persuna refusa da collavurar.
RR novitads 16:00