Iniziativa per l'AVSplus – pingpong d'arguments

Cun l’iniziativa «AVS Plus» vulan la sanestra ed ils sindicats augmentar las rentas d'AVS per 10%. Per ils adversaris metta l'iniziativa en privel l'entir sistem da la prevenziun da la vegliadetgna.

Laschar ir audio

2:21 min, Actualitad dals 08.09.2016

Dapi bun 70 onns datti ella, la Assicuranza per vegls e survivents (AVS). Dapi lura ha mintga Svizra e mintga Svizzer il dretg sin ina renta che duai curclar ils basegns existenzials. L’AVS è l’instrument da la prevenziun da la vegliadetgna e procura il medem mument per in equiliber tranter las generaziuns.

Enfin 353 francs dapli mintga mais

L’iniziativa vul ussa augmentar las rentas per diesch pertschient. Per ina persuna persula muntass quai enfin 235 francs e per in pèr maridà enfin 353 francs dapli mintga mais.

Tenor ils aderents è quai augment da gronda impurtanza. Gist ussa che las prestaziuns da las cassas da pensiun na pon betg pli gudagnar avunda sin il martgà da finanzas.

Betg da finanziar

Per ils adversaris è l'iniziativa «AVS plus» simplamain betg da finanziar. Gia ussa haja l'AVS da batter cun deficits da plirs milliuns francs mintg'onn. Pervia dal svilup demografic creschian quels enfin l'onn 2030 sin 7,5 milliardas francs mintg'onn. E quai senza ils 5,5 milliardas francs ch'in gea a l'iniziativa custassi.

Anna Serarda Campell ed Adrian Camartin dattan ina survista dals arguments pro e contra.