«Iniziativa da velo»: Cussegl federal fa cuntraproposta

Il Cussegl federal planisescha ina cuntraproposta a l'iniziativa da velo. Da principi saja el d’accord ch’il traffic da velo vegnia tractà tuttina sco il traffic da peduns ed il viandar, scriva il Cussegl federal. Però giaja l’iniziativa memia lunsch.

Il Cussegl federal planisescha ina proposta cunter l'iniziativa dal pievel.

Legenda da maletgs: Da principi cuntent, dentant... Il Cussegl federal planisescha ina proposta cunter l'iniziativa dal pievel. Keystone

L’iniziativa da velo va tenor l’avis dal Cussegl federal memia lunsch. Quai per raschuns finanzialas e persunalas e perquai ch'il traffic da velo saja chaussa dals chantuns.

Cunfins finanzials e persunals da Confederaziun

Concret renconuschia la regenza ch’il traffic cun velo possia gidar da sbassar las emissiuns da CO2 ed il diever d’energia e ch’el promovia la sanadad.

Dentant inditgescha il Cussegl federal che vias da velos sajan chaussa dals chantuns e da las vischnancas. Qua fruntia la Confederaziun sin cunfins persunals e finanzials. Ord quest motiv refusia il Cussegl federal er parts dal text da l’iniziativa.

RR novitads 12:00

Per tge vai?

L’iniziativa dal pievel «Per la promoziun da vias da velo, peduns e viandar» lantschada da la Pro Velo Svizra vegn sustegnida da 26 associaziuns e partidas. Ella vul agiuntar a la constituziun disposiziuns davart vias da velo per meglierar quellas. Dasper associaziuns da traffic sa participeschan er organisaziuns da sanadad, energia e d’ambient.