Siglir tar il cuntegn
Inhalt

Svizra Iniziativa da repatriament ha fin uss betg gì effect

Suenter il «gea» a l'iniziativa per in repatriament pli sever dad esters criminals mussa ina bilantscha suenter in onn pauc effect. La retschertga ch'è vegnida fatga tar 17 chantuns mussa, che pli u main medem blers esters criminals èn vegnids repatriads sco ils davos onns.

Arrestads che spetgan.
Legenda: Spetgan sin la repatriaziun: Arrestads en la curt da la praschun dal eroport da Kloten en il chantun Turitg (maletg da simbol). Keystone

Dapi in onn valan reglas pli severas per repatriar esters criminals, in effect n'è dentant anc betg da registrar. La «SonntagsZeitung» ha dumandà 17 chantuns e las cifras mussan ch'il dumber d'esters criminals repatriads è pli u main tuttin'aut sco ils davos onns.

Aifer 12 mais repatrià 400 esters criminals

Entaifer 12 mais èsi vegnì tar var 450 sentenzias da repatriar esters criminals. La fin finala han quels 17 chantuns repatrià en tut 400 esters criminals en la perioda dal prim d'october 2016 fin il prim d'october 2017. Intgins chantuns han dentant manegià, ch'i saja in pau baud da far ina bilantscha. L'effect da la midada da la nova lescha vegnia er pir a sa mussar suenter dus u trais onns. Quai ch'è dentant oz gia segir, i na vegn dentant mai a vegnir tar 4'000 repatriaments ad onn. Questa cifra aveva l'Uffizi federal da statistica numnà durant la campagna da votaziun.

Las reglas pli severas aveva il parlament decidì per realisar l'iniziativa per il repatriament acceptada il 2010 dal suveran svizzer.

RR novitads 10:00