Il president da la PCD, Gerhard Pfister, vul repeter la votaziun davart l'iniziativa cunter la discriminaziun da pèrs maridads – dentant be, sche quella vegnia anc ina giada discutada en il parlament. Quai ha Pfister ditg en la «Samstagsrundschau» da radio SRF.
Ina votaziun directa suenter ch'il Tribunal federal ha declerà la votaziun sco nunvalaivla, fiss per Pfister in problem. Il parlament stoppia avair las cifras correctas e guardar, sch’el vegnia ad in’autra recumandaziun.
L'emna passada aveva il Tribunal federal annullà la votaziun federala davart l’iniziativa ch’era stada avant 3 onns. Quai perquai ch’il carnet da votar cuntegneva cifras betg correctas davart ils pèrs maridads pertutgads.
RR novitads 15:00