Siglir tar il cuntegn

Header

video
Discurs cun cusseglier guvernativ Mario Cavigelli davart la decisiun dal Tribunal federal
Or da Telesguard dals 08.11.2017.
laschar ir. Durada: 3 minutas 18 Secundas.
cuntegn

Svizra Iniziativa da chatscha speziala na cuntrafa betg al dretg

L'iniziativa che vul abolir la chatscha speziala en il Grischun na cuntrafa betg al dretg superiur. Quai ha il Tribunal federal a Losanna decidì, pia cuntrari a la dretgira administrativa dal Grischun.

audio
Mezdi: Iniziativa da chatscha speziala na cuntrafa betg al dretg superiur
ord Actualitad dals 08.11.2017.
laschar ir. Durada: 5 minutas 27 Secundas.

Il Tribunal federal ha decis

Ils tschintg derschaders a Losanna han dà raschun als iniziants enturn Christian Mathis da Küblis e Renatus Casutt da Falera. Senza dubi in success per ils iniziants.

Il Cussegl grond grischun n'avess betg dastgà declerar l'iniziativa per abolir la chatscha speziala sco nunvalaivla. I na dettia nagina cuntradicziun tar il dretg superiur, è vegnì ditg. Quai vul dir ch'il Cussegl grond sto anc ina giada tractar l'iniziativa. Deputadas e deputads pon decider sch'i dat ulteriurs motivs per declerar nun-valaivla l'iniziativa. I saja dentant pauc probabel che quai saja il cas, uschia ils derschaders.

Il Tribunal federal ha era menziunà che la chatscha en il Grischun saja in patent dal stadi. Cunquai haja il chantun la pussaivladad da reglar la chatscha ed ordinar chatscha da reschia. Quai muntass che guardiaselvaschinas e betg persunas privatas reducessan l'effectiv da selvaschina.

video
Tenor Tribunal federal na cuntrafa l'iniziativa cunter la chatscha speziala betg al dretg
Or da Telesguard dals 08.11.2017.
laschar ir. Durada: 5 minutas 53 Secundas.

Cuntradicziuns da las instanzas grischunas

La regenza, il Cussegl grond e la dretgira administrativa dal Grischun avevan ditg che l'iniziativa na saja betg valaivla cunquai ch'ella cuntrafetschia al dretg superiur, pia a la lescha da chatscha ed a la lescha da guaud.

Els avevan era laschà far in'expertisa giuridica ed ina biologica. Lur argument: Senza la chatscha supplementara na vegnian ins betg da reducir il dumber da selvaschina ed i dettia uschia memia blers donns vid igl guaud.

audio
Saira: Reacziuns decisiun federala iniz. cunter chatscha speziala
ord Actualitad dals 08.11.2017.
laschar ir. Durada: 2 minutas 43 Secundas.

Iniziants cuntents – adversaris persvas

Ils iniziants da l'iniziativa èn satisfatgs da la decisiun da Losanna. Il Tribunal federal haja confermà la posiziun da l'Uffizi federal per l'ambient che n'aveva vis nagina cuntradicziun cun dretg superiur.

L'Uniun grischuna da chatschaders da patenta da sia vart quinta ussa cun ina votaziun. Els sajan segirs da pudair persvader la populaziun ch'i dovria la chatscha supplementara, ha ditg il president Robert Brunold.

«In signal positiv per nossa iniziativa»

Per l'iniziativa per ina chatscha etica saja la decisiun dal Tribunal federal in signal positiv, ha ditg l'inizianta e presidenta da l'uniun «Wildtierschutz Schweiz» Marion Theus sin damonda dad RTR. Ella quinta ussa che la Dretgira administrativa dal Grischun decleria sco valaivla l'iniziativa.

In punct da l'iniziativa per ina chatscha etica pertutga numnadamain era la chatscha speziala: A partir da l'emprim da november duai dar ina pausa da chatscha. Il Cussegl grond ha declerà 8 pretensiuns da l'iniziativa sco valaivlas e trais sco nun-valaivlas. Actualmain è l'iniziativa pendenta tar la Dretgira administrativa dal Grischun.

RR novitads 11:30

Artitgels legids il pli savens