Il tempo da vaccinar en Svizra saja memia plaun, quai di l'infecziolog turitgais Huldrych Günthard. Las persunas sur 65 stuessan gia esser vaccinadas cun il booster, sco el ha ditg a la SonntagsZeitung.
Era per persunas pli giuvnas saja il vaccin da rinfrestgament necessaria. Uschiglio pudessia prest vegnir tar la medema situaziun sco en l'Austria. Parallel tar il booster stoppian ils chantuns far tut per anc persvader quels che n'èn betg vaccinads, da tuttina laschar dar la squitta.
Confederaziun duai metter a disposiziun persunal
Crititgà ha Günthard era la Confederaziun: Lezza haja aspettà memia ditg da dar liber e da cussegliar da dar il vaccin da booster. Vinavant di el che la Confederaziun duai metter a disposiziun persunal dal militar e da la protecziun civila, per ch'i giaja pli svelt.
Ils vaccins da mRNA vegnian bain da retardar il dumber d'ospitalisaziuns en Svizra. Ma, cun quai che memia paucs sajan vaccinads, na vegnian ins betg d'evitar ina situaziun tut tenor fitg problematica.
