Siglir tar il cuntegn

Header

cuntegn

Industria da metal Igl avess blera lavur ma tscherta rauba manca

Ils carnets d’ordinaziuns tar las firmas da l’industria da maschinas, electronica e da metal svizra èn plains. Ma i dettia stretgas cun furnir, ha ditg il president da l’associaziun d’industria Swissmem, Martin Hirzel, en la «Samstagsrundschau» da radio SRF.

Ulteriuras sfidas per la branscha vesa Hirzel en las mesiras da corona che valan per tschertas citads chinaisas. Rauba ch’avess stuì vegnir dal port da Schanghai en l’Europa na vegnia ussa betg furnida. Las chadainas da furniziun sajan pervi da la pandemia e la guerra en l'Ucraina «crudadas cumplainamain or dal tact». Vid ina normalisaziun sin ils martgads na saja gnanc da pensar il mument.

Tuttina vinavant in martgà globalisà

Malgrà la crisa actuala na crai Martin Hirzel betg ch'ins vegnia davent d'in martgà globalisà. Bain saja vegnì pli impurtant quant datiers ch'in furnitur saja geograficamain, ma il martgà chinais vegnia vinavant a restar interessant.

Quai che fa ad el però in zic quitads è sch'il commerzi vegnia politisà pli e pli fitg. I possia daventar fitg grev per las fatschentas sche standards industrials na vegnissan betg pli renconuschids en blers pajas tuttina. Lura pudessia capitar ch'ina fatschenta dastgass u pudess furnir be pli en tscherts pajas u sin tscherts martgads. Il president da Swissmem è però optimistic che las fatschentas restan flexiblas e chattan soluziuns.

audio
Per tadlar: Las novitads da las 16:00
ord RTR Audio dals 23.04.2022.
laschar ir. Durada: 3 minutas 9 Secundas.

RTR novitads 16:00

Artitgels legids il pli savens