Siglir tar il cuntegn

Svizra Incendiader da Soloturn vegn internà

L'um ch'aveva dà fieu il 2011 a la catedrala St. Ursen a Soloturn, vegn internà. Quai ha ina dretgira dal chantun Soloturn concludì sin proposta da la procura publica. L'um che ha oz 66 onns refusia da cooperar da la terapia. Tenor expertisa haja el in grev disturbi psichic.

baselgia cun las consequenzas dal fieu avant l'altar
Legenda: Il fieu che l'um ha mess ha fatg in donn considerabel. Keystone

Latiers saja il privel da reversiun fitg grond. Tenor la procura publica n'haja la tenuta da l'um betg sa midada ed i saja da quintar cun ulteriurs grevs delicts. La defensiun ha dentant fatg valair che l'um na saja betg pli in privel per l'umanitad. El haja resentì il mund sco malgist ed intolerant ed haja vulì far attent sin sai.

Ils 4 da schaner 2011 aveva l'um svidà sur l'altar, il tarpun radund 20 liters benzin e dà fieu cun ina chandaila. Persunas n'èn betg vegnidas blessadas. Il donn è stà 3,5 milliuns francs.

Il 2009 ha l'um laschà sviar in tren tar la staziun Olten-Hammer ed il fanadur 2010 ha el tementà ils passagiers da tren en il tunnel dal Gottard cun ina «tschinta da bumba».

RR novitads 16:00