Siglir tar il cuntegn

Header

cuntegn

Svizra «Ina reducziun da la SDA ma fa quitads»

L'agentura da novitads SDA ha annunzià ina reorganisaziun e vul stritgar enfin 40 da las 180 plazzas da lavur ils proxims dus onns. Uschia vegn in'ulteriura interpresa publicistica sut squitsch. Questa tendenza saja in signal d'alarm.

Il trend è enconuschent: Las gasettas ston magunar pli paucas entradas da reclama, las gasettas vegnan fusiunadas e la SRG SSR è sut squitsch cun l'iniziativa No Billag che va en votaziun ils 4 da mars.

«Ina tendenza alarmanta»

Senza l'agentura da novitads restassan bleras paginas da las gasettas vidas, declera Vinzenz Wyss, professer per schurnalissem a la scol'auta ZHAW a Winterthur. La SDA porschia numnadamain in service da basa cun texts da novitads ed actualitads – betg mo per las gasettas, mabain era per radios, televisiuns e portals d'internet. Cunquai che quasi tut las redacziuns sajan dependentas da questa purschida, fissi ina reducziun alarmanta.

audio
Consequenzas d'ina reducziun tar la SDA
ord Actualitad dals 23.01.2018.
laschar ir. Durada: 2 minutas 47 Secundas.

Il problem na saja dentant betg la crisa enturn la SDA, mabain insumma la situaziun da las medias en Svizra. Il squitsch saja creschì massivamain perquai ch'i dettia adina pli paucas entradas da reclama e perquai che Svizras e Svizzers consumeschian ozendi auter las medias.

Vinzenz Wyss spera ch'i dettia en l'avegnir ina midada en la societad e che consumentas e consuments sajan puspè pli conscients che na tut possia esser gratuit, mabain ch'i custia da producir gasettas, far novitads al radio u emissiuns da televisiun.

RR actualitad 07:00

Artitgels legids il pli savens