Siglir tar il cuntegn
Inhalt

Svizra Ina morta pervi da mal'aura a Basilea

Il traffic public è medemamain stà influenzà oz a bun'ura. A Turitg han nagins sgols pudì parter per ina mes'ura.

Purtret d'ina planta sragischada.
Legenda: Planta crudada pervi d'in stemprà (maletg da simbol). Keystone
  • A Riehen en il chantun Basilea citad è ina dunna vegnida mazzada d'ina planta ch'è crudada, quai ha annunzià la procura publica da Basilea.
  • L'ultima notg è stada burascusa en Svizra. Il stemprà «Zubin» ha suflà cun ina spertadad dad enfin 140 kilometers l'ura.
  • Il vent ferm ha era chaschunà problems tar las navs dal Lai Bodan ed ils trens da l'Appenzeller Bahn.
  • Er l'eroport da Turitg è pertutgà. Uss possian ils eroplans dentant puspè sgular.

Pervi dal vent ferm han las navs tranter Romanshorn e Friedrichshafen betg pudì cursar per in temp, quai è stà da vesair sin l'infurmaziun da la viafier. Er l'Appenzeller Bahn ha gì difficultads ed ha stuì metter giu il traffic per in tschert temp tranter Weissbad e Wasserauen. Sin il traject èn bus stads en acziun.

Il stemprà «Zubin» ha furià cun spertadads maximalas da passa 100 kilometers l'ura. En la muntogna per part perfin cun spertadads d'enfin 140 kilometers l'ura.

Er l'eroport da Turitg è pertutgà. «Pervi dal vent ferm n'èsi il mument betg pussibel da sgular davent da l'eroport da Turitg», ha declerà Raffaela Stelzer da l'eroport Turitg oz avantmezdi. Ussa saja la situaziun puspè sa calmada in zic ed ils eroplans sgolan puspè. Stads pertutgads sajan ils sgols che partan da Kloten.

Era oz duai anc suflar enavant uschia e restar adina puspè surtratg. L'avertiment per plazzas aviaticas e navs resta. Suenter 20 enfin 30 cm naiv nova ch'i ha dà questa notg en tschertas muntognas duai tenor Meteo Svizra anc ina giada dar radund 40 cm en la proxima notg sin venderdi.

RR novitads 9:00